आगामी रचना
सुनलव महिमा भारी हे
छत्तीसगढ़ महतारी के2
बड़े बिहनिया चिरई चिरगुन
जेकर महिमा गाथे
हाथ जोड़े आसीस खातिर
चरन माथ नवाथे
गोदी खेले जेखर लइका,
मीठ मीठ गुंज किलकारी के
छत्तीसगढ़ महातारी के....
हरियर लुगरा हरियर पोलखा
हाँथ म हरियर धान हे
खेती डोली के साज सिंगारे
जोहर ललना किसान हे
हाँथ तुतारी खाँध मा नाँगर
बइला जस संगवारी के
छत्तीसगढ़ महातारी के...
अरपा पैरी महानदी के
लहरा मा सब तर जाथे
पीके पानी निर्मल गंगा
भुंइया हमर हरियाथे
चंपा चमेली महके जिंहा
सुघर सोभा फुलवारी के
छत्तीसगढ़ महातारी के...
सुआ करमा पंथी ददरिया
पंडवानी के राग हावय
थिरके थाप नंगारा के संग
सतरंगी रंग फाग हावय
ऊंच नीच ल जाने नाहीं
रंग भरे पिचकारी के
छत्तीसगढ़ महातारी के...
राजीम लोचन शिवरीनारायन
जग म मान बढ़ाए
बइठके जिंहा भाँचा राम
शबरी के बोईर खाए
भगति नवधा पावय जिंहा
रघवर राम उपकारी के
छत्तीसगढ़ महातारी के...
दुरगा दाई के पबरित डेरा
डोंगरगढ़ बमलाई
महामाई अंगारमोती संग
किंजरय बिलई माई
आस पुरोदे तै हो माता
तोषण असन पुजारी के
छत्तीसगढ़ महातारी के...
बीर नरायन गुंडाधुर जस
कतको बीर बलिदानी हे
पार नइ पावन अड़हा लइका
जेखर अमर कहानी हे
रहय जियत ले खून म सबो के
फूंक अइसन चिंगारी के
छत्तीसगढ़ महातारी के...
**************
तोषण धनगंइहा
९६१७५८९६६७
यह रचना मेरे ब्लाग
http://acharyatoshan.blogspot.com
पर सुरक्षित है ।
कोई टिप्पणी नहीं:
एक टिप्पणी भेजें