."गोलू के बिहाव "

ए रचना ह मोर गोलू कका ल समर्पित हे
जेहा भारत माता के सेवा करत हे
।ओखर फोटू संग मा...
."गोलू के बिहाव "
******************
नांव हावय नूतन गोलू
लइका हमर बबा के।
मडवा म जमके नाचबो
बिहाव हे गोलू कका के।।
******************
संगे बाढेन संगे खेलेन
खाएन अरम पपइय्या।
मैं बनगेंव गुरूजी संगी
गोलू बनगे सिपईहा।।
करे देश के रक्षा संगी
बन्दुक गोली चलाके।
मडवा म जम के नाचबो
बिहाव हे गोलू कका के.॥१॥
******************
दंता श्री ला नेवता देके
मडवा ल परघाबोन।
ढेड़हीन ढेडहा मीलके
सुघर चूलमाटी लाबोन
मडवा बने सजाबो संगी
करसा दीया जलाके
मडवा म जम के नाचबो
बिहाव हे गोलू कका के.॥२॥
******************
हरदी चढही हमर कका के
मंगल गीत ल गाबोन।
मैन नाचा झुमरही संगी
बनेच हरदाही मताबोन।
पिंवराही गोलू के काया
तेल हरदी मा सनाके
मडवा म जम के नाचबो
बिहाव हे गोलू कका के.॥३॥
******************
बाजा बाजही आचार्य जी के
केंवरा ददरिया गाबोन।
दोहा परही नूतिश भाई के
मोहरी निशान गदकाबोन।।
डमउ डफरा बेन्जो तासा
सरगम सबे जमाके
मडवा म जम के नाचबो
बिहाव हे गोलू कका के.॥४॥
******************
गोलू बनही दूल्हा राजा
सुट बूट पहिराबो जी।
महर महर ममहावै कका ह
फॉग परफ्यूम लगाबोन जी।।
नइ राहंव महूं हा पाछू
जाहूं सफारी चमकाके
मडवा म जम के नाचबो
बिहाव हे गोलू कका के.॥५॥
******************
दरबारी नवागांव मा
जाबोन जी बरतिया।
कोनो जाही मारशल मा
कोनो जाही फटफटिया।।
हम तो जाबोन रे भैय्या
याद के बोलेरो लगाके
मडवा म जम के नाचबो
बिहाव हे गोलू कका के.॥६॥
******************
लगन परही गोधुली बेरा मा
सब के मन हरसाही गा।
होही कन्यादान रे भैय्या
करजा जम्मो छुट जाही गा।।
आही काकी हमर अंगना
दाई ददा ल रोवाके
मडवा म जम के नाचबो
बिहाव हे गोलू कका के.॥७॥
******************
होही धरम टीकावन घर मा
बबा, डोकरी दाई के हांथ ले।
आही गोलू के ममा मामी
सब परिवार ल साथ ले।।
रावटे परिवार आशीष दिही
हजारों हाथ लमाके
मडवा म जम के नाचबो
बिहाव हे गोलू कका के.॥८॥
******************
लाडू बरा खाबोन संगी
संग मा सबला खवाबो।
जुग जोड़ी सलामत रहे
अइसन दुआ मनाबो।।
ग्रुपिंग फोटो खिचाबो सबे
एक जगा जुरियाके
मडवा म जम के नाचबो
बिहाव हे गोलू कका के.॥९॥
******************
रचनाकार-आचार्य तोषण
ग्राम-धनगांव, डौंडीलोहारा
जिला-बालोद, छ. ग.
४९१७७१
मुहूबाईल:९६१७५८९६६७