होरी तिहार मा...

होरी तिहार मा...
एसो के होरी तिहार मा
नंगतेहे उधम मचाबो
डोकरा बबा डोकरी दाई
सबला गुलाल लगाबो।।

नई छोड़न भइय्या भउजाई
बड़का बबा अउ बड़की दाई
कका काकी दाई ददा संन
सुघर फगुवा गाबो।
एसो होरी तिहार मा
नंगतेहे उधम मचाबो।
माते सरसो के फुलवारी
सियान मितान संग संगवारी
धरे गुलाल अबीर हाथ मा
पिचका अजब चलाबो।
एसो होरी तिहार मा
नंगतेहे उधम मचाबो।
रंग पानी के होरी तिहार
बिन पानी हे सब बेकार
जल जीवन हे ए अनमोल
पानी हमन बचाबो।
एसो होरी तिहार मा
नंगतेहे उधम मचाबो।
चउहान भइय्या मिलन मलरिहा
हीरा लहरी ललित टिकरिहा
जख्मी ललित महेनदर माटी
अमन देव संन नंगारा बजाबो
एसो होरी तिहार मा
नंगतेहे उधम मचाबो ।।
-आचार्य तोषण