बाबा समागम

बाबा समागम
भक्त: बहुत दिन ले बेरोजगार हों ,नौकरी नी मिलत हे ,का करो?
बाबा: ऐखर पहिली तंदूरी चिकन कब खाए रेहे?
भक्त: आज तक नी चखे हो।
बाबा: तभे किरपा कम होवत हे।पहिली कोनहो फाइव स्टार होटल मे बइठके चिकन तंदूरी खा किरपा दौड़ के आही नौकरी घलो लग जाही।
भक्त:बाबा होटल के बिल ल का किरपा भरही?
बाबा: बिल भरे के पैसा नइहे त इंहा आए काबर?
भक्त: जतिक रिहिस ओला एन्ट्री फीश मे जमा करदेंव अब पैसा कहां ले लांव।
बाबा: अच्छा आहनचो किरपा कम होवत हे। अच्छा बता चना कब ले नी खाहस ?
भक्त: रोजेच तो चना खाके गुजारा करत हंव।
बाबा: आज ले चना खाएबर बंद करदे। किरपा आए के शुरू होजही। चना के पैसा बांचही तेकर चिकन तंदुरी खालेबे। सब बने हो जही।
भक्त: अरे चना ल नी खाहूं त जीहूं कइसे?
बाबा: ए मोर समस्या नोहे।
भक्त:मोर दोनो किडनी खराब हे लीवर सड़ गेहे डाक्टर मन जवाब दे डरे हे कुछु करव बाबा।
बाबा: ठर्रा कब ले नी पीएहस?
भक्त: का बात करथस बाबा मे तो चाय काफी ल घलो हाथ निलगांव।
बाबा: ईही तो बात हे एकरे पाएसे किरपा कम होवत हे। जिनगी मे ठर्रा नीपीबे त किडनी लीवर सब खराब होही। जा पहिली ठर्रा पीके आ।
भक्त:मोर बिहाव नी होत हे बाबा।
बाबा: बिहाव मे लाडू कबले नी खाहस?
भक्त:काली परनदिन नरनदिन त खाए रेहेव बाबा।
बाबा: दुसर के बिहाव मे रोज रोज लाडु खाबे त किरपा कहां ले आही। अब बरफी खा जलदी बिहाव होजही।
भक्त: बाबा मेहा बड पढथौ फेर परीक्षा मे पास नी होवव।
बाबा: अच्छा कामा पढाई करतहस।
भक्त:बी एस सी करतहंव।
बाबा: कोन कोन से सबजेक्ट हे ?
भक्त: फिजिक्स कैमेस्ट्री मैथ्स बाबा।
बाबा: एखरे सेती किरपा नी आत हे। काली ले राजनीति अउ दर्शन शास्त्र के पढाई कर अउ बी एस सी के पेपर देवा पास हो जबे।
तथास्तु॥